منتديات بلو
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

مذكرات طبيب عراقي حديث التخرج

اذهب الى الأسفل

مذكرات طبيب عراقي حديث التخرج Empty مذكرات طبيب عراقي حديث التخرج

مُساهمة  noeeleesa الثلاثاء مارس 11, 2008 7:06 am

قررت اكتب شي مختلف عن كتاباتي السابقة ولو هوة هم حقيقة ,البارحة جنت خفر بطوارئ الجراحية وقررت اسوي احصائية عن الحالات الي دتستقبلها طوارئ الجراحية والاسباب الي ادت الها ومقارنتها بقبل الحرب وشوفوا النتيجة

- حالات العض
تناقصت حالات عضات الكلاب وبنسبة حادة بعد الحرب وقد يرجع ذلك لسببين , الاول هو قيام الحكومة بمطاردة الكلاب واعتقالها واصدارها قانون حظر التجول ليلا خوفا عالمواطن ليعضة كلب, اما السبب الثاني فهو ان الكلاب فضلت الهجرة بعد ان رأت ان الوضعية متساعد عالعيشة خصوصا ان العراقيين عالزبل لحكوها ومبقه واحد تعضة لان الحكومة والاميركان ممقصرين من هاي الناحية , وعضة كلب ولا سجن الحكومة ولزمة شرطي
فيما سجلت حالة عضة حمار واحدة قبل الحرب لم تسجل ولا حالة بعد الحرب وهذا يرجع الى سببيين برأيي , الاول وهو الرئيسي وهو تولي الحمير مناصب وزارية وقيادية وكاموا يستنكفون حتى يشوفون البشر , اما الثاني فهو ان الحمير اضطهدت من قبل الحكومة وجرى تصفيتها او جعلها تهرب فارة خارج العراق لتعيش غربة قسرية


وازدادت حالات عض النسوان بعد الحرب مما يعكس انتعاش الديمقراطية وحرية التعبير في مجتمعنا المتمدن وانتقال الحوار من مرحلة استخدام السلاح الاسود المحرم دوليا (النعال) الى مرحلة الاكتفاء بالشتم والسب واستعمال السلاح الابيض (العض) غير المحرم


- جنون العظمة
سجلت حالات جنون العظمة ارتفاعا حادا بعد الحرب , ففيما سجلت حالة واحدة في سب وشتم صدام علنا قبل الحرب نقل صاحبها المريض الى مستشفى الحاكمية للامراض النفسية والعقلية نرى انها ارتفعت ارتفاعا حادا بعد الحرب لتشمل سب من هو اكبر مني ومن صدام ومنكم


- البواسير bounce
شهدت حالات البواسير و الفطر الشرجي ازديادا ملحوظا بعد الحرب مما يعكس حالة الضغط والشد التي يعيشها العراقيين وكانت الزيادة خصوصا عند افراد مغاوير الداخلية والحرس الوطني ,وعند سؤالي احد افراد المغاوير واحد افراد الحرس الوطني تطابقت الاجابات بان الاعراض تظهر وتزداد من يطلعون واجب او من يبلغوهم بواجب واسهل طريقة للفلتة هي الادعاء بالمرض وخصوصا البواسير واذا جان لوتي فيكول فطر لان الامر مستحيل حيميز او يندل الفطر هذا اذا كلة تعال افحصك فياخذ ارسال من الوحدة ويفلت ويجي للمستشفى يبيع بطولات ويهمبل ويسوي نفسة حامي حمى العراق وبعدين يكوم يتوسل من ترفض ان تنطيه اجازة


rendeer - حوادث السيارات
ازدادت الحوادث بشكل ملحوظ بعد الحرب برغم قيام الحكومة باغلاق نص شوارع بغداد وقيام الاحزاب بوضع الموانع الطبيعية مثل الكونكريت وغيره وذلك لمنع هاي الحوادث الا ان ذلك لم ينفع وما ادري ليش وكانت حوادث الكيا على راس الحوادث تلتها الاوبل وبفارق بسيط

- الصعقة الكهربائية Twisted Evil
انخفضت معدلات الصعقة الكهربائية وبصورة حادة جدا مما يدل على نجاح الحكومة في تطبيق قانون الوقاية خير من العلاج وسجلت حالة واحدة فقط بعد الحرب وكان صاحبها فكر ديشتغل بالكهرباء والظاهر الحكومة رادت تنطي مكرمة فانطتها لمدة نص ساعة اثناء شغله بالكهرباء وانتل والله هذا غير فكر


affraid - التسمم بالنفط
وهاي هم شهدت انخفاظ ملحوظ وانتوا احسن مني تعرفون الاسباب


- الادمان عالسيكوتين Basketball
شهد انخفاضا ملحوظا وذلك لان المواد الاولية للسيكوتين لازم تلزملها سرة يومين لو تشتري الخمس لترات مغشوش بماي بالفين دينار والمدمنين منين يجيبون قابل يبوكون؟

- حالات الهستيريا
ازدادت حالات الهستيريا بعد الحرب خصوصا بين البنات مما يدل على ان البواري قد ازدادت وهي علاقة طردية على ما اعتقد

- الكحول bounce
ازدادت حالات شرب العرك بعد الحرب برغم ان جميع قادتنا والحمد لله همة سادة وشيوخ والصور تارسة الشوارع لعمايم وغتر ويا عراقي تحجي وياه جاوبك باية لو حديث لو حكمة لاحد الائمة ولحد الان ملكيت تفسير مقنع لهاي الظاهرة الغريبة

- الرشوة geek
ازدادت حالات الرشوة سواء بين الكادر الصحي او الشرطة , فبرغم ان راتب الشرطي وصل للمليون من ورة جورج قرداحي وبرنامجه وخصوصا احنا شرطتنا اذكياء جدا وجاوبوا كل الاسئلة وربحوا المليون الا ان الرشوة زادت من الف دينار قبل الحرب الى خمسة الاف دينار لاقل شغلة بعد الحرب واول البارحة وكفني شرطي شايل المسدس بالكوة عمرة حوالي 16 سنة ومن عرف اني دكتور كالي شكد راتبك كتلة 280 الف دينار جاوبني الله يرضاها محمد يرضاها شلون بلد انت تاخذ راتب بكدي واني اتعب اكثر منك !!!!!


afro - الاطلاقات النارية
وهاي هم زادت زيادة كبيرة مما يعكس ان منتخبنا مخسر ولا لعبة وتصنيفة ديصعد بالفيفا

- الوعي الصحي بين الممرضين
وهاي هم بلوة جديدة زادت لان الممرض ميقبل هسة تصيحه باسمه الا تضيفله لقب مولانا لو سيد فلان واذا مسويتها يكلب الدنيا عليك وهاي ذكرتني بقبل الحرب من جان النايب ضابط يامر اللواء بالجيش لان النايب ضابط عضو فرقة واللواء نصير وهسة الاسطوانة دتتكرر لان تلكى المضمد لو عضو بحزب الدعوة لو بجيش المهدي لو سلفي لو بدري لو ...........

- اعمار المستشفيات
وهاي الخطة الذكية الي ما اعرف يا عبقري اكتشفها , انه تسد معظم مستشفيات بغداد بهذا الظرف وتبنيها من جديد بحجة اعمار بس الحقيقة لفط ونهب لان مشفت من الاعمار بس الصبغ


lol!

noeeleesa

المساهمات : 490
تاريخ التسجيل : 25/01/2008

الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى